Zhvillimi ekonomik i Shqiperise!

Në një takim të zhvilluar me specialistët e Fondit Ndërkombëtar
Monetar, përfaqësuesit e Konfidnustrisë kanë paraqitur platformën e
tyre në lidhje me ndryshimet fiskale që janë realizuar kohët e fundit
në vendin tonë. Njëkohësisht ata kanë prezantuar para specialistëve të
FMN-së dhe hapat që duhen ndërmarrë për të përmirësuar dhe nxjerr nga
informaliteti ekonominë shqiptare. Qëllimi kryesor i takimit ishte
diskutimi mbi hapat që duhen marrë për formalizimin e ekonomisë
shqiptare duke eliminuar shkaqet ligjore dhe institucionale që
ndihmojnë në krijimin e evazionit fiskal. Për këtë gjë industrialistët
kanë rekomanduar dhe një paketë ligjore me disa shtylla bazë që mund të
ndihmojnë në shmangien e informalitetit. Ku përfshihet vendosja e
TVSH-së dhe për biznesin e vogël nëpërmjet futjes së kasave
regjistruese. Njëkohësisht është kërkuar dhe ndërtimi i Gjykatës
Administrative/Tregtare të pavarur nga ekzekutivi, krijimi i Shkollës
Fiskale për trajnimin e punonjësve të institucioneve fiskale, si dhe
ligji i procedurave ankimore të hartohet në bazë të standardeve
evropiane. Ndërkohë që në platformë janë paraqitur dhe disa pika për
mbështetjen e prodhimit vendas nëpërmjet zëvendësimit të Politikave
Tregtare me Politika Fiskale, sipas modeleve të BE-së. Ku është
kërkuar, “Ndjekja e politikave diferencuese të akcizes nga sasia e
prodhimit për pijet alkoolike dhe birrën, e cila do sjell një efekt
prej 5 deri në 7 milionë eurosh në vit të ardhura për shtetin.
Mbështetje për politiken qeveritare të uljes së taksave (taksa e
sheshtë). Do ketë rritje të ardhurash buxhetore, formalizim dhe kusht
për rritjen e konkurrueshmërisë së vendit për thithjen e investimeve të
huaja”, ka deklaruar administratori i Konfidnustrisë Gjergj Buxhuku.